Comune di CuglieriComune di Cuglieri

Bai a is testus

Bai a s'elencu



Pagina:

A susu


Testus

Su Mare

Attraessandhe sas costas da sas Renas finzasa a Porto Alabe, si podene biere logos de una bellessa rara. Pragias longas, battadinos, rios e trainos chi faghene s'istrampu a mare da sas costas altas de Cabu Nieddu. Una palte pitticca de su buscu 'e opinos e de sa pragia de sas Renas appaltenede a Cuglieri, su prusu est territoriu de Narabulia. Inoghe, cuccuros de rena in colore 'e oro s'isterrene giai po 5 km unu fattu e s'atteru. In beranu candho s'abbas sunu bundantes, sos trainos si interrana in sa rena e favorini sa froridura de tantas elbas, orchideas, mudregu, tramatzos, e bellas margheridas chi s'isterrene subra sos cuccuros de rena. In tempu de assutore, custos cuccuros de rena sunu dominados da s'almiddha, da sa pramma nana e da sa gariga, tottu prantasa chi rezzene bene sa siccagna de s'istiu. Finasa a su 1950, candho est cuminzadu su rimboschimentu de sos upinos, s'agataini solu custos cuccuros de rena, e difattisi custu logu fudi cunsideradu “zona predesertica” e po tutelare custa zona est istada fatta sa legge numeru 31 de su 1989, chi dezzidiada sa naschida de su “Parcu Naturale Regionale de su Sinis Montiferru”.

Sighinde sa costa da sas Renas si passada a sa Turra 'e su Puttu e S'Alchittu. Inoghe su logu cuminzada a variare, si biene infattisi roccalzos de calcaree biancos nidos, prenos de fossiles, e medas calas pitticas. Si ciapada innoghe s'alcu naturale iscavadu da su mare chi ha dadu su nomene a sa bulgada de S'Alchittu, e d'est istadu ricconnoschidu cun sa legge Regionale n.31/89 comente monumentu naturale.

Prus a denanti si ciapada Santa Cadrina 'e Pittinuri chi oramai est una iddha chi est istada fraigada a pustis de sa sigundha gherra Mundiale a inghiriu de sa creja de S.Cadrina. Sutta su Paris de sa Turra de Pittinuri s'isterrede sa pragia de Santa Cadrina chi sos prus annos a càusa de su riu 'e Salamedu e de sas currentes marinas est isterrida da codula manna e pitticca chi zughede inserrada totta s'istoria geologica de su Montiferru. Sa costa sighede cun sas roccasa calcareasa de su Riu 'e sa Ide. Pustis cuminzan sos battadinos de pedra niedda finzas a Foghe, da inue in calchi trettu, in annadas proggianas, si poden biere istrampos de abba trainalza chi si imbolana a mare.

S'imbattede a Cabu Nieddu inue sa costa est sempere “battadina”.Est propriu ispreosu a s’ accuccare po ‘iere su mare chi est de una chiza paurosa candho sas undhas imbattene a sas roccas de basaltu nieddas pighidas . Da sa turra 'e Foghe b'hada una isione bella meda, a cara si poded biere Cabu Mannu e Maluentu, a manu manca sas Renas, S.Cadrina e S'Alchittu, a dresta sa turra 'e Columbalza, Bosa e sa Nurra. Su logu chi est in mesu tra su mare 'e Saldigna e s'istrada S.S. 292 fròmmada su pedralzu e Sessa, isterrida de terrinu giarosu, prantadu a laore e a binzas, inue onzi trettu si bien domos bistadas fraigadas da sa riforma agraria E.T.F.A.S a finitia de sos annos '50 e sos annos '60; inoghe si poded biere zassos de rara bellesa sì si bi colada in sos meses de 'eranu. Poltu Alabe est s'abeltura a mare chi tened Tresnuraghes e d'est unu bulgu de impoltu po su turismu de sa Pianalza, est nàschidu a inghiriu de sa crejighedda de S.Maria 'e su Mare. Da sa iddha prevìa de un'iscalinada si calada finzas a imbattere a sa pragia e a su mare.

 
@ Comunu de Cuglieri

A susu