Comune di CuglieriComune di Cuglieri

Bai a is testus

Bai a s'elencu



Pagina:

A susu


Testus

Fraigos de impoltu religiosu

SA CREJA 'E SANTA MARIA 'E SU NIE-BASILICA
Parede chi siede istada fraigada in su XIV seculu. Narada una paristoria chi in su 1300 una cascia 'e linna cun s'istatua de sa Madonna aintro, s'est arrenada in sa pragia de Santa Cadrina e Pittinuri. Si narada chi 'nde cheriana attire custa istatua a Cuglieri, e la cheriana ponnere in sa creja de Santa Rughe chi assora fudi creja mazzore, ma sos boes, chena intendhere su cumandhu de su carradore, hana sighidu a caminare finas a imbattere a su puntu prus baltu de su Monte Baldosu. Custu contu si podede biere figuradu in d'una de sas isculturas de malmaru fraigadas in sa facciada de sa Creja 'e S.Maria. E tandho propiu in custu zassu est'istada fundhada sa Creja de S.Maria e su Nie. In su 1807 su Paba Pio VII l'hada dadu su titulu de Collegiata. In su 1919 Benedetto XV l'hada dadu su titulu de Basilica Minore.

SA CREJA 'E NOSTRA SIGNORA DE SA GRASCIA (CUVENTU)
Parede chi eppede tentu origine a sa fine de su '400 o a s'incuminzu de su '500. In su 1545, pro more de sa donatzione de su dominariu da palte de sa famiglia Zatrillas, ch'est istadu agiuntu su Cuventu de sos “Selvos de Maria”, su primmu oldine Religiosu de Cuglieri. Lughia Zatrillas,posta tra sas feminas Beadasa de s'Oldine de sos selvitos Servi di Maria, hada azuadu meda unu zeltu Padre Alessandro, po fraigare su Cuventu e sa Creja. Candho una vintina de annos faghede hana dadu un'aconzada a sa Creja est'istada iscobelta una tumba propiu in sa capella inue po sa Chida Santa si faghede sa funzione de “S'Ingravamentu”, chi siede custa sa tumba de Lughia Zatrillas?...

SA CREJA 'E CAPUZZINOS
Custa creja cun su Cuventu est bistada fraigada in su '600 da su Piscamu busincu Traviano Manca de Cadrelles. A s'incuminzu che funi sos Franziscanos. Da su 1613 fudi impitadu da sos Padres Capuzzinos. De custos padres si ammentada su Cuglieridanu Frà Paolo Perria, naschidu in Cuglieri su 29 de Ennalzu de su 1650 e moltu su 13 de Frealzu de su 1727 in cunzetu 'e santidade. Una pintura chi est accolta in sa Creja de Capuzzinos, ammentada unu fattu de ispantu chi li fu suzzessu candho l'haiana prenau sa beltula de ozzu in d'unu mulinu, e issu che l'hada zutta finasa a su Cuventu chena 'nde peldere un'istidhiu.

SA CREJA 'E SANTA RUGHE
Custa creja est'istada fraigada in sa palte prus antiga de Cuglieri. E d'est sa creja prus antiga de sa iddha. In prinzipiu si naraidi sa creja 'e S.Silbana. S'ischidi chi sa Cunfraria est de su XVI seculu.

SA CREJA 'E SU CALMINE
De custa Creja si agattana documentos de su 1600 cun su nomene de Sant'Ulbanu. Da su 13 de Sant'Andria de su 1702 hada leadu su nomene de sa beata Vergine de su Calmine.

SA CREJA 'E SANTU GIUANNE
Parede chi siede de sos primmos annos de su 500, primmu de sa creja de Capuzzinos. Sa cunfraria naschede po opera de laicoso ma sempere sutta s'amparru de sos predisi de sa iddha. Su notte de su 23 de Lampadas, pesperu de sa festa de Santu Giuanne Battista, si faghede su ritu de S'Abba Muda: s'isettada unu pagu intro sa creja a pes de s'istatua de Santu Giuanne pizzinnu estidu de peddhe de anzone, si essidi dae creja e caminandhe in s'oru de s'istrada, “po lassare passare in mesu sas animas de sos moltos” sempere chenza faeddhare e chenza si oltare a desegus, si andhada a sa funtana de Tiu Memmere, si buffada abba chi sanada sos males de su colpus e de s'anima; a sa matessi manera a sa muda e chenza si oltare si torrada a creja e si finidi. Custu cultu nuragicu de s'abba 'e sa salude s'este ammeschiadu cun su tempus cun su ritu Cristanu de su battesimu chi cun s'abba che samunaidi su peccadu originale. In d'onzi modu sa zente chi crède a custa usanzia la sighede finzas a dies de oe cun seriedade e cunvinzione.

 
@ Comunu de Cuglieri

A susu